Бразилияның Фос-ду-Игуасу қаласында өтіп жатқан World Boxing ұйымының Әлем кубогының бірінші кезеңінің екінші жарыс күнінде Қазақстаннан екі боксшы шаршы алаңға шықты.

55 келіге дейінгі салмақта Бағлан Кенжебек 1/16 финалда армениялық Жирайр Саргсянмен кездесіп, төрешілердің бөлінген шешімімен 2:3 есебімен жеңіліп қалды. Айта кетейік, үшінші раундта қазақстандық боксшы қарсыласын нокдаунға жіберген.

Ал 65 келіге дейінгі салмақта Мұхаммедсабыр Базарбайұлы тунистік Хассен Атиамен жұдырықтасып, төрешілердің бірауыз шешімімен 5:0 есебімен сенімді жеңіске жетті.

Еске салайық, бұл турнирде Қазақстан құрамасы бастапқыда 16 боксшымен (9 ер, 7 әйел) қатысуда.

Қазақстан ерлер құрамасының капитаны, жуырда Моңғолияда өткен Азия чемпионатында аса ауыр салмақта алтын медаль жеңіп алған Айбек Оралбай өз өнеріне баға беріп, алдағы жоспарларымен бөлісті.

Сіздер үнемі ірі жарыстарға бірге барып жүрсеңіздер де, Моңғолияда ғана екеуіңіз чемпион атана алдыңыздар. Осы сәтті қалай қабылдадыңыздар? Жасөспірім кездеріңізде де бірге чемпион болған сәттеріңіз көп болып па еді?

• Иә, Азия чемпионатында бір үйден чемпион атанып жатқан жайымыз бар. Бұған дейін 10-15 турнирде бірге топ жарған едік. Алайда ересектер арасындағы ірі жарыстар бірінші рет осындай жағдай тіркеліп отыр. Қуаныштымыз. Бұйырса, күзде өтетін жазғы Азия ойындары, 2027 жылы Астана төрінде, 2028 жылы Лос-Анджелес Олимпиадасында да осы жетістіктерімізді жалғастырсақ деген сенімдеміз.

Әуел бастан сіз аса ауыр салмақта Азия чемпионатының басты фавориты саналдыңыз. Жарысқа фаворит ретінде бару сізді босаңсытпай ма? Азия чемпионатындағы жекпе-жектерге көңіліңіз қаншалықты толады?

• Әлем чемпионы және 2 дүркін Азия чемпионы ретінде барған соң, міндетті түрде фаворит ретінде саналдым. Бұның артықшылығы – өз-өзіңе деген сенімділігің болады. Бірақ еш босаңсуға болмайды. Өйткені қарсыластар атағы бар боксшылармен барын салып жұдырықтасып, сенсация жасауға тырысады. Басқа салмақтарда да айқын фавориттердің жеңілгенін көрдік. Оның үстіне аса ауыр салмақта күтпеген бір соққы жекпе-жектің тағдырын шешіп кету ықтималдығы жоғары.

Бас бапкер Нұржан Насанов өз сұхбатында Нұрбек пен Айбек толықтай бабында болмады деді. Сіз де өзіңізді сары құрлық додасына 100% бабында болмадым деп ойлайсыз ба?

• Иә, біз бас бапкер Нұржан Насановқа физикалық дайындығымыздың толықтай 100% болмағанын алдын ала ескерттік. Шамамен 60-70 пайыз шамасында өз әлеуетімізді көрсеттік деп ойлаймыз. Бұйырса, қыркүйек айындағы жазғы Азия ойындарына сақадай cай боламыз. Өздеріңіз білетіндей, спортшы бір жылда 1-2 мәрте ғана дайындығының шыңына жетеді. 

2025 жылы әлем чемпионаты және 2026 жылы Азия чемпионатында да сіздің жекпе-жегіңіз жалпы есептегі бірінші орынның тағдырын анықтады. Бірақ сізге бұл фактор қатты әсер етпеген секілді?

• Әлем чемпионатында Өзбекстанмен боксшысымен өткен айқас жалпы есептегі бірінші орынның тағдырын шешті. Геннадий Головкин де өзінің ағалық кеңесін айтып, қолдауын танытқан еді. Нәтижесінде соңғы секундқа дейін жеңіс үшін аянып қалмай, еліміздің абыройын асқақтаттым. Сондай-ақ мен ерлер құрамасының капитаны ретінде әлем чемпионаты мен Азия чемпионатының шешуші жекпе-жектерінде жеңісім өзге жігіттерге психологиялық басымдық береді деп ойлаймын.

Бас бапкер Нұржан Насанов үшін өткен Азия чемпионаты үлкен сынақ болғаны түсінікті. Тіпті ол кісі түнімен қарсыластардың жекпе-жектерін көріп, зерттедім деді. Сіздерге ол кісінің ақыл-кеңестері қаншалықты көмегін тигізді?

• Нұржан ағамыз Азия чемпионатына бірінші рет келіп жатқан жоқ. Бірақ бас бапкер ретінде жауапкершілігі үлкен екенін білеміз. Күнделікті ағайымызбен қарсыластарымызды талқылап, зерттедік. Боксшы ретінде біз оған, бапкер ретінде ол кісі әр жекпе-жектегі жайттарды айтып отырды. Бірге атқарылған жұмыс өз жемісін берді. Нұржан ағамызға алғысымыз шексіз.

Азия чемпионаты, әлем кубоктары алдағы Азия ойындарына дайындық ретінде саналатындығы түсінікті. Осы орайда сіздің басты қарсыластарыңыздың бірі - Жахонгир Зокировтың АҚШ-та дайындалып жүргенін көрдік. Сіздер 3 мәрте кездесіп үлгердіңіздер ғой. Оның қарқыны артып жатқаны сезіле ме? Жапонияда одан да басқа қауіпті қарсыластар бар ма?

• 2026 жылдағы басты мақсатымыз – жазғы Азия ойындары. Бұйырса, жазда біз де АҚШ-қа жаттығуға барамыз. Жахонгирден бөлек те, басқа елдердің боксшылары осал емес. Ешкімді бөліп жармаймын. Ең бастысы, өзім толықтай бабымда болуға барымды саламын.

Сіз аса ауыр салмақта қаншалықты бейімделіп үлгердіңіз? Өзіңіздің салмағыңызды таптыңыз ба? Ел ішіндегі сізге лайықты спарринг қарсыластар табыла ма?

• Аса ауыр салмаққа ауысқаныма бір жылдан астам уақыт өтті. Әлі де бір-екі қателіктеріміз бар. Жарысқа шығатын салмағымызды анықтадық. Сол салмағымды ұстауға тырысамын. Ел ішінде де лайықты спарринг қарсыластар бар. Қазір Қазақстанда, шетелде де біріккен оқу-жаттығу жиындарында тәжірибе алмасып, өзімнің дайындығымды одан әрі жетілдіріп жатырмын. Мысалы, Азия чемпионатының алдында «Алматау» спорт базасында Германия боксшысымен спарринг өткіздік. Азия ойындарына дейін тағы бірнеше шетелдік боксшылармен дайындалу жоспарымызда бар.

Оқу-жаттығу жиыны мен жарыстарда ағайынды Оралбайлар мен ағайынды Сабырхандар үнемі бірге жүреді. Махмұд пен Төрехан ұлттық құрамадағы ең жақын достарыңыз деп санауға бола ма?

• Махмұдпен бірге 2018 жылдан бері бірге келе жатырмыз. Жастар арасында жаттықтық. Ересектер сапына бірге өттік. Төреханға туған ініміздей қарап, жастар құрамасында жүргенде ақыл-кеңестерімізді айтып жүретінбіз. Сол кездері Махмұд өз інісінің ересектер сапына қосылғанын күтіп жүретін еді. Міне сол күнге де жеттік. Ағайындылар ретінде де бір-бірімізге қолдауымызды аямаймыз. Алдағы уақытта төртеуіміз тарихи жеңістерді тіркейміз деген сенімдеміз. Өздеріңіз куә болғандай, 2025 жылы Ливерпульде ағайынды Сабырхандар әлем чемпионы атанып, ерекше жетістікті тіркеген болатын. Ұлттық құрамадағы басқа жігіттермен де қарым-қатынастарымыз жақсы. Ешкімді бөліп-жармаймыз.

Енді мамыр айында Өзбекстанда бірлескен оқу-жаттығу жиыны өтеді деп естідік. Оған дейін толық қалпыңызға келіп үлгере аласыз ба?

• Мамыр айына дейін құрамаға кішігірім демалыс берілді. Қазіргі сәтте отбасыммен біргемін. Одан кейін Өзбекстанға аттанамыз. Әлем кубогы да бар. Әлі босаңсуға ерте. Себебі, алда жазғы Азия ойындары бар.

World Boxing федерациясының ұйымдастыруымен өтіп жатқан әлем кубогының бірінші күнінде бес отандасымыз өнер көрсетті.

Дүбірлі додада 3 дүркін әлем чемпионы Назым Қызайбай Түркия өкілі Айсен Таскинмен жолығып, 4:1 есебімен басым түсті.

Одан кейін 1/8 финалда Дәулет Төлемісов бразилиялық Фильо Исайаспен қолғап түйістірді. Отандасымыз бірінші нөмірде жұдырықтасып, басымдықты алуға тырысса да, қарсылас қарымта шабуылда жылдам әрі дәл соққыларымен жеңісті өз еншісіне жазды. Қорытынды есеп: 0:5.

Сондай-ақ Жансері Көшербаев (60 келі) ирландиялық Джуд Галлахерге есе жіберіп, 1/16 финалдан аса алған жоқ.

Кешкі сессияда Фарух Тоқтасынов (70 келі) әлем кубогын сенімді бастады. Ол ирландиялық Джон МакКоннелді 3:2 есебімен жеңді. Енді ол 22 сәуірде 1/8 финалда былтырғы әлем чемпионатының финалисі, жапониялық Севон Оказавамен жұдырықтасады.

Сондай-ақ ел құрамасынан Диас Молжігітов (80 келі) Жапония боксшысы Кай Ториабені еш қиындықсыз қапы қалдырды. Жекпе-жек екінші раундта тоқтатылды. Отандасымыз 22 сәуірде 1/8 финалда аустралиялық Марлон Севехонмен шаршы алаңға шығады.

Беделді бәсеке Бразилияның Фос-ду-Игуасу қаласында 20-26 сәуір аралығында өткізіледі.

Бокстан 20–26 сәуір аралығында Бразилияның Фос-ду-Игуасу қаласында рекордтық 50 мемлекеттің қатысуымен әлем кубогының бірінші кезеңі өтеді.

Күндізгі сессия Қазақстан уақытымен 19:00-де және кешкі сессия 01:00-де басталады.

Ерлер
50 келі. 13 қатысушы
1/8 финал
Даниал Сабит – Иштван Шзака (Венгрия)

55 келі. 27 боксшы
1/16 финал
Бағлан Кенжебек – Жирайр Саргсиян (Армения)

60 келі. 27 боксшы
1/16 финал
Жансері Көшербаев – Джуд Галлахер (Ирландия)

65 келі. 30 боксшы
1/16 финал
Мұхаммедсабыр Базарбайұлы – Хассен Атиа (Тунис)

70 келі. 29 боксшы
1/16 финал
Фарух Тоқтасынов – Джон МакКоннел (Ирландия)

1/8 финалда әлем чемпионы Севон Оказавамен жолығуы мүмкін.

75 келі. 9 боксшы
1/4 финал
Санжарали Бегалиев – Саиджамшид Джафаров (Әзербайжан, әлем чемпионатының 2 мәрте жүлдегері)

80 келі. 23 боксшы
1/16 финал
Диас Молжігітов – Кай Ториабе (Жапония)

85 келі. 7 боксшы
1/4 финал
Сұлтан Айбарұлы – Паоло Карусо (Италия)

90 келі. 16 боксшы
1/8 финал
Дәулет Төлемісов – Фильо Исайас (Бразилия, Ливерпульдегі әлем чемпионатының күміс жүлдегері)

Әйелдер
51 келі. 23 қатысушы
Алуа Балқыбекова 1/8 финалда Михаела Бадеску – Златислава Чуканова (Болгария) жұбының жеңімпазымен жолығады.

54 келі. 20 қатысушы
1/16 финал
Назым Қызайбай – Айсен Таскин (Түркия)

60 келі. 18 қатысушы
1/8 финал
Виктория Графеева – Емили Рзаева (Әзербайжан)

65 келі. 22 қатысушы
Аида Әбікеева 1/8 финалда Виктория Жилкова (Чехия) – Мезморизе Андерсон жұбының жеңімпазымен жолығады.

70 келі. 17 қатысушы
Наталья Богданова 1/8 финалда Бусеназ Сюрменели (Түркия, Токио Олимпиадасының чемпионы) – Чиара Сарайелло (Италия) жұбының жеңімпазымен жұдырықтасады.

80 келі. 3 қатысушы
1/2 финал
Жібек Жарасқызы – Емилиа Котерска (Польша, U23 Еуропа чемпионы)

+80 келі. 2 қатысушы
Финал
Валерия Аксенова – София Шира (Венгрия)

Түркістанда бокстан КСРО-ның еңбек сіңірген спорт шебері, елімізге еңбек сіңірген жаттықтырушы Әбдісалан Нұрмахановты еске алуға арналған халықаралық турнир өтті. Ересектер арасында  32-ші рет өткізілген жарысқа Өзбекстан, Тәжікстан, Әзербайжан, Кувейт, Қырғызстан және еліміздің барлық өңірінен 100-ден астам қатысушы жүлдеге таласты.

50 келі
1-орын. Нұрғиса Тұрабеков (Түркістан обл)
2-орын. Ернар Қарап (Абай обл)
3-орын. Дулат Амангелді (Астана)
3-орын. Иброхимжон Рахмонжонов (Өзбекстан)

55 келі
1-орын. Кенже Мұратұлы (Алматы обл)
2-орын. Ядигар Алиев (Әзербайжан)
3-орын. Кожиакбар Ибрагимов (Өзбекстан)
3-орын. Асхат Сағындықов (Түркістан обл)

60 келі
1-орын. Хусравхон Рахимов (Тәжікстан)
2-орын. Асиддин Рузимуродов (Өзбекстан)
3-орын. Огабек Умаркулов (Өзбекстан)
3-орын. Асылжан Серікбай (Шымкент)

65 келі
1-орын. Абзал Серік (Шымкент)
2-орын. Ерәділ Ұзақбай (Түркістан обл)
3-орын. Нұрлыбек Османов (Шымкент)
3-орын. Жанарыс Орынбай (Шымкент)

70 келі
1-орын. Нұрқадам Әбдреш (Астана)
2-орын. Мейрбек Кыргызов (Қырғызстан)
3-орын. Абдулазиз Бохаймед (Кувейт)
3-орын. Мейірлан Әбіләшім (Түркістан обл)

75 келі
1-орын. Аман Қонысбеков (Түркістан обл)
2-орын. Абубакр Гафуров (Тәжікстан)
3-орын. Аднан Алхазвини (Кувейт)
3-орын. Сирожиддин Кожахметов (Өзбекстан)

80 келі
1-орын. Нұрқанат Раис (Маңғыстау обл)
2-орын. Шохжохон Алишеров (Өзбекстан)
3-орын. Бақберген Әлиасқаров (Астана)
3-орын. Елсұлтан Тұрғынбек (Түркістан обл)

85 келі
1-орын. Ислам Бетаев (Астана)
2-орын. Самат Айтбай (Түркістан обл)
3-орын. Бекзат Таңатар (Шымкент)
3-орын. Бахромбек Хатамов (Тәжікстан)

90 келі
1-орын. Бекболат Әбдікерім (Түркістан обл)
2-орын. Жанатбек Ақжанов (Түркістан обл)
3-орын. Нұржан Мәуен (Ақтөбе обл)
3-орын. Жасұлан Омар (Шымкент)

+90 келі
1-орын. Мадияр Саидрахимов (Өзбекстан)
2-орын. Нұрлан Сапарбай (Түркістан обл)
3-орын. Дәурен Сүйіндіков (Ақтөбе обл)
3-орын. Абдулазиз Абдумажидов (Өзбекстан)

U19 командасы алдағы үлкен додаларға жан-жақты дайындық жүргізіп, күш пен техникасын арттыру мақсатында ауқымды жұмыс атқарылып келеді.

Естеріңізге сала кетсек, биыл бұл жас дәрежесінде WORLD BOXING аясында Азия чемпионаты да, әлем чемпионаты да ұйымдастырылады. Құрлықтық сайыс 3-16 шілде Джакарта (Индонезия), ал дүниежүзілік дода 14-27 қазан Будваға (Монтенегро) жоспарланған.

Сонымен қатар, биыл жастар арасындағы Олимпиада Ойындары да өтпек. Кешенді жарыс 31 қазан мен 13 қараша аралығында Дакарда (Сенегал) ұйымдастырылады.

20-25 сәуір аралығында бокстан халықаралық дәрежедегі КСРО спорт шебері және КСРО-ның бес дүркін чемпионы Болат Теміровты еске алуға арналған U23 санатындағы III халықаралық турнир ұйымдастырылады.

Жарысқа жастар арасында әлем чемпионатының жүлдегерлері Бексұлтан Боранбек, Өнер Сейілхан және Азия чемпионы Темірлан Мұқатаев және т.б еліміздің бірқатар боксшылары қатысады.

Жас спортшыларымыз үшін алдағы турнир жазда өтетін U23 Азия чемпионатына дайындық ретінде есептеледі.

2026 жылғы алғашқы әлем бокс кубогының кезеңінеҚазақстан құрамасынан 16 боксшы қатысады. Жарыс 2026 жылдың 20–26 сәуірі аралығында Бразилияның Фос-ду-Игуасу қаласында өтеді.

Жарысқа 50-ден астам елден 400-ге жуық боксшы қатысады деп күтілуде. Еліміздің атынан Нұржан Насанов баптайтын ерлер құрамасынан 9 боксшы және Елдос Сайдалин жетекшілік ететін әйелдер құрамасынан 7 боксшы жүлдеге таласады.

Бразилия өз тарихында екінші мәрте әлем кубогының кезеңін ұйымдастыруға мүмкіндік алды. 2025 жылы жерлестеріміз 3 алтын, 3 қола жүлде иеленген еді. Олардың арасынан Нұрсұлтан Алтынбек (55 келі), Дәулет Төлемісов (85 келі) және Жазира Орақбаева (51 келі) чемпион атанды.

Биылғы жарысқа төмендегідей боксшылар қатысады:

Ерлер.

50 келі. Даниял Сәбит (дебют)

55 келі. Бағлан Кенжебек (дебют)

60 келі. Жансері Көшербаев (дебют)

65 келі. Мұхаммедсабыр Базарбайұлы (дебют)

70 келі. Фарух Тоқтасынов (дебют)

75 келі. Санжарәли Бегалиев 

80 келі. Диас Молжігітов (Бразилиядағы әлем кубогының қола жүлдегері)

85 келі. Сұлтанбек Айбарұлы (Үндістандағы әлем кубогының жеңімпазы)

90 келі. Дәулет Төлемісов (Бразилиядағы әлем кубогының жеңімпазы)

Былтырғы Бразилияға барған құраммен салыстырсақ, тек Диас Молжігітов (80 келі) мен Дәулет Төлемісов (90 келі) сақталған. Құрамадағы басты ерекшеліктің бірі – жастар арасында әлем чемпионы Санжарәли Бегалиев пен Мұхаммедсабыр Базарбайұлының төменгі салмаққа ауысқанын айтуға болады. 60 келіде Жансерік Көшербаев та ересектер арасында өзін алғаш рет көрсетуге мүмкіндік алмақ. «Странджа» турнирінде жақсы қырынан көрінген Бағлан Кенжебекке (55 келі) әлем кубогында тағы сенім артылмақ.

Әйелдер 

51 келі. Алуа Балқыбекова (Астанадағы әлем кубогының күміс жүлдегері)

54 келі. Назым Қызайбай (Астанадағы әлем кубогының жеңімпазы)

60 келі. Виктория Графеева (Астанадағы әлем кубогының жеңімпазы)

65 келі. Аида Әбікеева (Астанадағы әлем кубогының қола жүлдегері)

70 келі. Наталья Богданова (Астанадағы әлем кубогының жеңімпазы)

80 келі. Жібек Жарасқызы (дебют)

+80 келі. Валерия Аксенова (дебют)

2025 жылғы Ливерпульдегі жетістіктерімізден кейін аруларымыздың көпшілігі енді ғана ресми жарысқа оралмақ. Бұл тізімде 4 бірдей (Алуа Балқыбекова, Назым Қызайбай, Аида Әбікеева, Наталья Богданова) әлем чемпионы бар.

Кейінгі бір жылдың ішінде ұлттық құрамада жарқырап көзге түскен боксшылардың бірі – Оразбек Асылқұлов. Әлем және Азия чемпионы атанған спортшы бізбен сұхбатында мансабы, жеңістері мен алдағы жоспарлары жайлы ой бөлісті.

Сіз Азия чемпионатында өзіңізге жаңа салмақ саналатын 60 келіде топ жардыңыз ғой. Осы орайда эмоцияңызбен бөліссеңіз?

• Моңғолиядағы сары құрлық додасында жоғары мақсатты көздедім. Ең бастысы, Қазақстан ішінде 60 келіде нөмір бірінші боксшы екендігімді дәлелдеуге тырыстым. Солай болды деп ойлаймын. Өзім 2009 жылдан бері өмірімді боксқа арнап, Олимпиада, Әлем, Азия чемпионаттарын жеңуді жоспарладым. Ақырындап жоспарларым орындалып келеді. 17 жыл деген үлкен спортта ұзақ мерзім. 28 жас деген бокста «кеш» саналады. Көпшілігі сынаққа төзбей, спортты тастап кеткендері де қаншама. Сондықтан өзіме разымын және жеңіске әлі «ашпын».

Өзіңізді дәлелдедіңіз деп ойлаймын. Жарыс барысы қалай өтті? Қай жекпе-жек қиынға соқты?

• Негізі ширек финалда Ливерпульдегі әлем чемпионатының қола жүлдегері Шунсуке Китамотомен (Жапония) қиын айқасты күткен едім. Бірақ ол бірінші айналымда Азия чемпионы Акмал Убаидовпен өткен жекпе-жекте қабағынан жарақат алып, рингке шыға алмады. Финалда да Үндістан спортшысы Сачин Сачинмен жұдырықтасу оңай болмады. Өздеріңіз көргендей, 1-раундтан кейін 0:5 есебімен жеңіліп жатып, соңында 3:2 есебімен басым түстім. Оның үстіне менің кездесуім жалпы есепте Қазақстан немесе Үндістанның бірінші орын алуына тікелей әсер етті.

Сіз финалда бірінші раундтан соң, 0:5 есебімен есе жіберіп жаттыңыз ғой. Сол сәтте көп боксшылар эмоцияға ерік беріп, бастапқы тактикасынан жаңылып жатады. Сіздің салқынқанды жұдырықтасуыңызға не әсер етті?

• Бас бапкер Нұржан Насанов үзілісте еш қобалжымай, салқынқанды айқаса беруімді талап етті. Сол кісінің ақыл-кеңесі жақсы көмектесті. Бәлкім, егер ұтылып жатсың, асығу керек деп айтса, жеңіс бұйырмаушы ма еді.

Басқа боксшылармен салыстырар болсақ, сіздің жасыңыз құрамадағы көпшілігінен үлкен ғой. 28 жасқа келіп, тәжірибеңіз артып, енді пісіп жатқандайсыз?

• 2024 жылы Таиландтағы Азия чемпионатының финалына дейін жеттім. 2025 жылы әлем чемпионы атандым. Сол кездегі тәжірибем Моңғолияда жеңіске жетуге септігін тигізді.

Бұған дейінгі жетістіктеріңіз 57 келіде тіркелді ғой. Алда осы 60 келіде қаласыз ба әлде 55 келіге түсесіз бе?

• Таза салмағым – 62 келі. Осы салмақта болған өзіме ыңғайлы. Бірақ әлі салмақ қосуым керек. Жарыс барысында салмағым 59 келіге дейін түскен сәттер кездесті. Азия чемпионы болсам да, еш босаңсуға болмайды. Қазақстан ішінде де бәсекелестік жоғары. Серік Теміржанов, Бейбарыс Жексен және т.б мықты боксшылар жеткілікті. Өздеріңіз білетіндей, 60 келі Азия ойындары мен Лос-Анджелес Олимпиадасының бағдарламасына кіреді. Енді сол жарыстар мен 2027 жылы Астанада өтетін әлем чемпионатында көк туымызды желбіретуге барымды саламын.

Құрамада кіммен жақсы араласасыз? АҚШ-тан келген ағайынды Камачолардың жаттығуы сіздерге сезіле ме?

• Ұлттық құрамада үнемі Сабыржан Аққалықовпен бірге жаттығып, бірге жүреміз. Әлем чемпионаты мен Азия чемпионатына барып, жеңіс тұғырына көтерілдік. Оның көзге түсетін қасиеті – көп еңбектенеді.

Ағайынды Камачолардың дайындығы ерекше. 1,5 жылдың ішінде физикалық және функционалдық жағынан оң өзгеріс сезіледі.

Енді отбасы жағына ауыссақ. Сіз жайлы көп ақпарат біле бермейміз.

• Анам екеуміз бірге тұрамыз. Анам жұмыс істемейді. Отбасымда асыраушы – өзім. Әпкем тұрмысқа шыққан. 2 баласы бар.

Анаңыз сіздің жекпе-жектеріңізді көре ме?

- Иә, көріп отырады. Алғаш рет теледидардан тамашалаған сәтте сен жақсы жұдырықтасады екенсің ғой деп таңғалған еді.

Сіз 11 жастан бері бокспен айналысып келемін дедіңіз. Бүгінгі Оразбектің қалыптасуына қандай әлемдік деңгейдегі боксшылар әсер етті?

• 2 дүркін Олимпиада чемпионы Гильерме Ригондо (Куба) мен Василий Ломаченконың (Украина) жекпе-жектерін көріп өстім. Отандық бокстан Серік Сәпиевтің аяқта жұмыс істеу стилі қатты ұнайтын. Сол секілді көптеген боксшылардың мықты тұстарын өзіме алуға тырыстым.

Сіз 2018 жылдан бері ұлттық құрамада келе жатырсыз ғой. Сол кезеңдерден бері бірнеше бас бапкер ауысты. Қандай ерекшеліктерін байқадыңыз?

• Барлық бас бапкермен қарым-қатынасым жақсы болды. Мырзағали Айтжановтың тұсында Олимпиада чемпионы Абдумалик Халоковты жеңген болатынмын. Менен кейін оның жеңіс сериясы 33-ке дейін жалғасып, 2 әлем чемпионаты, жазғы Азия ойындары, Париж Олимпиадасында топ жарды. Тек Дубайдағы әлем чемпионатының финалында ғана төрешілердің даулы шешімімен қарсыласқа жол берді. Енді алда Жапонияда өтетін жазғы Азия ойындарында Абдумаликпен қайта кездесіп қалуымыз ықтимал. Қайрат Сәтжанов тұсында әлем чемпионы атандым. Нұржан Насановтың кезеңінде Азия чемпионатының «алтын» жүлдесін еншіледім.

Ақмола облысының тумасысыз ғой. Сізді Көкшетауда қаншалықты көшеде танып жатады?

• Көкшетаудан қарағанда, Астана мен Шымкент қалаларында көп танып, амандасады. Салыстырмалы түрде бокс Ақмола облысында қатты танымал спорттардың қатарына кірмейді. Бірақ Руслан Мусинов, Теміртас Жүсіпов және т.б мықты спортшылар үнемі шығып тұрады.

Сұхбатыңызға рақмет!

Бокстан Қазақстан әйелдер құрамасы Бразилияның Фос-ду-Игуасу қаласында халықаралық оқу-жаттығу жиынын өткізіп жатыр.

8-20 сәуір аралығындағы дайындыққа Қазақстаннан бөлек, Түркия, Англия, Ирландия, Венесуэла, АҚШ, Бразилия елдері өзара тәжірибе алмасуда.

Ал 20-26 сәуір аралығында боксшылар дәл осы қаладағы World Boxing әлем кубогының алғашқы кезеңіне қатысады.

Қазақстан әйелдер командасының сапында Алуа Балқыбекова, Назым Қызайбай, Виктория Графеева, Аида Әбікеева, Наталья Богданова, Жібек Жарасқызы және Валерия Аксенова бар.

Құрамаға аға жаттықтырушы Марат Қырықбаев жауапты.

Қазақстан әйелдер құрамасы 8-12 сәуір аралығында Финляндияның Хельсинки қаласында өткен GeeBee халықаралық турнирінде үш медаль жеңіп алды.

Әлем чемпионатының бірнеше мәрте жүлдегері, 54 келідегі Жайна Шекербекова чемпион атанды. Оның жеребесі қиын болса да, алғашқы кезеңде әлем чемпионатының ширек финалисі Габриелла Вирхеймді (Нидерланд ), 1/4 финалда Ливерпульдегі әлем чемпионатының қола жүлдегері Сирин Чараабиді (Италия) жеңіп кетті. Ал жартылай финалда жарыс қожайыны Эмма Йокиахо және финалда АҚШ өкілі Джейшаннет Запатадан басым түсті.

1982 жылдан бері өткізіліп келе жатқан турнирде Данияр Елеусінов, Абылайхан Жүсіпов, Қайрат Ералиев сынды танымал боксшыларымыз топ жарғанымен, әйелдер арасында Жайна Шекербекова осы турнирді жеңген алғашқы отандық ару атанды.

Сондай-ақ 51 келідегі Анита Адишева көзге түсе білді. Ірі жарыстарда мүмкіндік алып жүрген отандасымыз турнир барысында Финляндия спортшысы Елса Нархи мен Мишель Никол Весковиниді (Италия) ұтты. Тек шешуші сында ол Франция боксшысы, Еуропа чемпионатының бірнеше мәрте жүлдегері Василя Лькадириге (Франция) жол берді.

Ал 70 келідегі Жасмин Кизатова жартылай финалға дейін жетіп, қола медаль иеленді.

Айта кетейік, GeeBee турниріне Бельгия, Дания, Финляндия, Франция, Германия, Италия, Нидерланд, Норвегия, Шотландия, Швеция, Швейцария, АҚШ және Уэльс елдерінен 100 спортшы қатысты.