Алматы қаласында Қазақстанның тұңғыш Қорғаныс министрі, Кеңес Одағының Батыры және Халық қаһарманы Сағадат Нұрмағамбетовтың құрметіне арналған XXIX халықаралық бокс турнирі жалғасып жатыр.

Жарыстың екінші күнінде басты сенсация ретінде U22 Азия чемпионы, 60 келіге көтерілген Нұрсұлтан Алтынбектің жеңілісі болды. Ол Абай облысының өкілі Ерасыл Амангелдиевпен жұдырық түйістіріп, 1:2 есебімен есе жіберді.

Қалған жекпе-жектерде өз салмағында фаворит саналған отандастарымыз оңай жеңіске жетті. Атап айтсақ, 60 келідегі Дәулет Молдашев Қарағанды облысының жас әрі талантты спортшысы Нығмет Нығманды 2:1 есебімен ұтты. Сондай-ақ Талғат Сырымбетов (60 келі), Абзал Серік (65 келі), Елнұр Сүйінбай (70 келі), Санатәлі Төлтаев (70 келі), Нұрқанат Райыс (80 келі) cынды көпшілік танитын жерлестеріміздің де мерейі үстем болды.

Айта кетейік, жарыс жеңімпаздары 29 мамырда белгілі болады.
 

Алматы қаласында Қазақстанның тұңғыш Қорғаныс министрі, Кеңес Одағының Батыры және Халық қаһарманы Сағадат Нұрмағамбетовтың құрметіне арналған XXIX халықаралық бокс турнирі басталды.

Жарыстар Орталық спорт клубы армиясының базасында өтіп жатыр және дәстүрлі түрде қазақстандық бокстың болашақ жұлдыздары сынға түсетін негізгі алаңдардың бірі саналады.

Биылғы турнирге Қазақстан, Өзбекстан, Қырғызстан, Тәжікстан және Қытайдан келген шамамен 130 спортшы қатысып жатыр. Қатысушылар үшін бұл жарыс тек медаль үшін емес, ұлттық құрама бапкерлерінің алдында өздерін көрсетіп, кәсіби мансапта үлкен қадам жасау мүмкіндігі ретінде қарастырылып отыр.

Көрермендердің ерекше назары Орталық спорт клубы армиясы командасының құрамына ауды. Командаға тәжірибелі спортшылармен қатар жас боксшылар да енген. Олардың қатарында Олимпиада ойындарының қола жүлдегері және екі дүркін әлем чемпионы Сәкен Бибосынов, Азияның 22 жасқа дейінгі чемпионы Бекнұр Батырбек, жақында ғана қайта шаршы алаңға қайта оралған Абзал Серік, 2024 жылғы Қазақстан чемпионы Талғат Сырымбетов, сондай-ақ жастар біріншіліктерінің жеңімпаздары Нұрбол Мұхаметәлі, Абылай Сман және Дархан Дүйсебай бар.

Сәғадат Нұрмағамбетовтың құрметіне арналған турнир соңғы отыз жылға жуық уақыт ішінде Қазақстан спорты үшін маңызды әрі беделді жарыстардың біріне айналды. Осы жылдар ішінде бұл додада елді әлемдік аренада танытқан көптеген спортшылар бақ сынап, жеңіске жеткен.

Олардың қатарында Олимпиада чемпионы Серік Сәпиев, әлем чемпионы және әлемге кеңінен танымал боксшы Геннадий Головкин, Олимпиада чемпиондары Василий Жиров, Бақтияр Артаев, Данияр Елеусінов, сондай-ақ әлем чемпионы Жәнібек Әлімханұлы бар.

Жекпе-жектер 13 салмақ дәрежесінде өтеді. Жеңімпаздарға спорт шебері атағы беріледі және турнир 29 мамырға дейін жалғасады.

Түркістан қаласында бокстан Олимпиада ойындарының және әлем чемпионатының күміс жүлдегері Мұхтархан Ділдәбековтің жүлдесіне арналған жастар арасындағы халықаралық турнир аяқталды.

Жарысқа еліміздің және шетелдің жас боксшылары қатысып, жоғары деңгейдегі тартысты жекпе-жектер өтті.

Төменде салмақ дәрежелері бойынша жеңімпаздар мен жүлдегерлер тізімі берілген:

50 келі

1-орын: Әділет Абылайхан (Шымкент)
2-орын: Нұрбол Нұржанов (Қарағанды обл.)
3-орын: Нұрым Боранбай (Қарағанды обл.)
3-орын: Қуаныш Құралбай (Түркістан обл.)

55 келі

1-орын: Азамат Ернұр (Жетісу обл.)
2-орын: Арсен Досымқұл (Жамбыл обл.)
3-орын: Айдын Сейсенбай (Астана)
3-орын: Бекнұр Әбдіхан (Қарағанды обл.)

60 келі

1-орын: Алдияр Бахадур (Түркістан обл.)
2-орын: Ерасыл Батырбек (Шымкент)
3-орын: Ақарыс Егенберген (Алматы)
3-орын: Умар Орусбаев (Қырғызстан)

65 келі

1-орын: Темірлан Әбдірайым (Алматы)
2-орын: Расул Сейдіш (Жамбыл обл.)
3-орын: Мәнсүр Тілеужан (Қарағанды обл.)
3-орын: Сырым Отжан (Түркістан обл.)

70 келі

1-орын: Ерлан Дарманқұл (Түркістан обл.)
2-орын: Гайрат Иристаев (Түркістан обл.)
3-орын: Даниял Шалқарбай (Алматы)
3-орын: Кутманбии Муратов (Қырғызстан)

75 келі

1-орын: Әлихан Примбетов (Түркістан обл.)
2-орын: Ақпан Молдаш (Түркістан обл.)
3-орын: Мұрат Махамбетқалиұлы (Ақтөбе обл.)
3-орын: Нұрбек Сериков (Түркістан обл.)

80 келі

1-орын: Қуаныш Ұрымбасар (Түркістан обл.)
2-орын: Арсентий Андрейкин (Жамбыл обл.)
3-орын: Рахат Жақсылық (Жетісу обл.)
3-орын: Ихтияр Алиддинов (Түркістан обл.)

85 келі

1-орын: Таннур Сейсенбай (Жамбыл обл.)
2-орын: Нұрасыл Тұрарбекұлы (Шымкент)
3-орын: Нұрдаулет Қалдар (Астана)
3-орын: Нұрхан Мешітбай (Ақтөбе обл.)

90 келі

1-орын: Бақсұлтан Орындық (Түркістан обл.)
2-орын: Нұрлыхан Жайшылық (Ақтөбе обл.)
3-орын: Бекжол Аманжол (Жамбыл обл.)
3-орын: Ермахан Төлепберген (Түркістан обл.)

+90 келі

1-орын: Аян Дүйсенбек (Түркістан обл.)
2-орын: Мағжан Сеитов (Шымкент)
3-орын: Саян Ұлан (Түркістан обл.)
3-орын: Алдияр Исқақов (Түркістан обл.)

Қазақстан бокс федерациясының президенті Шахмұрат Мүтәліп жылдық конференция барысында маңызды бағыттарға тоқталды.

Оның айтуынша, 2025 жылы жоғары деңгейде ұйымдастырылған Әлем кубогінен кейін, 2027 жылы Астана қаласында өтетін Әлем чемпионатын да дәл сондай жоғары ұйымдастырушылық деңгейде өткізу қажет.

«Ерекше атап өткім келетіні — барлық берілген тапсырмалар мен қойылған міндеттер бос сөз болып қалмай, іс жүзінде нақты жүзеге асырылуы тиіс. Спортшылардың тәртібіне, әлеуметтік желідегі мінез-құлқына ерекше көңіл бөлінуі қажет. Спорттағы идеологиялық және тәрбиелік бағыттың маңыздылығын да ұмытпауымыз керек», — деді федерация президенті.

Сонымен қатар, 2026–2030 жылдарға арналған боксты дамыту тұжырымдамасы бекітілгені айтылды. Бұл құжатта орта мерзімді кезеңге арналған боксты дамытудың негізгі бағыттары мен бірыңғай тәсілдері айқындалған.

Астанада Қазақстан бокс федерациясының 2025-2026 жылдардағы жұмыс қорытындылары шығарылып, алдағы олимпиадалық циклдегі негізгі міндеттер айқындалған жыл сайынғы конференция өтті.

Конференция барысында Әлімжан Ақаев ұйымның халықаралық қызметіне арналған баяндама жасады. ҚБФ вице-президенті Қазақстанның World Boxing ұйымындағы ұстанымын нығайту және отандық мамандардың Asian Boxing комиссияларындағы өкілдігін кеңейту мәселелеріне кеңінен тоқталды.

Сондай-ақ ұлттық құрамаларды 2026 жылы Нагояда (Жапония) өтетін Азия ойындарына және 2026 жылы Дакарда (Сенегал) ұйымдастырылатын жасөспірімдер Олимпиадасына дайындау жұмыстары сөз болды. Бұдан бөлек, Халықаралық Олимпиадалық комитеті бекіткен 2028 жылғы Лос-Анджелес Олимпиадасына іріктеу жүйесіне назар аударылды. 2027 жылдың сәуір айында Астанада олимпиадалық іріктеудің алғашқы кезеңі саналатын әлем чемпионаты өтеді. Спикер халықаралық жарыстарда спорттық этика талаптарын сақтау мен төрешілік жүйесіне цифрлық технологияларды енгізудің маңызын да атап өтті.

Конференция соңында Қазақстан бокс федерациясы халықаралық аренадағы позицияны нығайту және негізгі жарыстарға дайындықты қоса қамтитын қазіргі олимпиадалық циклдің стратегиялық міндеттерін жүйелі түрде жүзеге асыруды жалғастыратыны атап өтілді.
 

Бокстан Қазақстан ерлер құрамасы Өзбекстанның Янгиабад қаласында бірлескен оқу-жаттығу жиынына қатысып жатыр.

Аталған жиынға Қазақстаннан бөлек, Өзбекстан, Тәжікстан және Корея құрамалары қатысуда.

Оқу-жаттығу жиынының бағдарламасы бойынша әр елдің боксшылары шеберлігін шыңдап, жалпы дене дайындығына жұмыс жүргізуде.

Айта кетейік, екінші Әлем кубогының кезеңі 15-21 маусым аралығында Қытайдың Гуйян қаласында өтеді.

Туризм және спорт министрі Ербол Мырзабосынов Қазақстан бокс федерациясының президенті Шахмұрат Мүтәліппен бірге 2027 жылғы бокстан әлем чемпионатына дайындық барысын инспекциялау мақсатында Астанаға келген World Boxing халықаралық ұйымының өкілдерімен кездесті.

Жиынға World Boxing ұйымының бас хатшысы Томми Рене Жозефин Дилен, Олимпиада чемпионы Серік Сәпиев, сондай-ақ ұйым мен министрлік өкілдері қатысты.

Ербол Мырзабосынов Қазақстанның World Boxing ұйымымен ынтымақтастығының маңызын атап өтіп, әлем чемпионатын өткізу отандық спорт үшін маңызды оқиға екенін айтты.

«Қазақстан Президенті Қасым-Жомарт Тоқаев бокстың еліміздегі ұлттық спорт түрлерінің бірі ретіндегі айрықша рөлін бірнеше рет атап өтті. Астанада әлем чемпионатын өткізу отандық боксты дамытуға, халықаралық спорттық байланысты нығайтуға және жастар арасында спортты насихаттауға үлкен серпін береді», – деді министр.

Кездесу барысында тараптар 2027 жылғы әлем чемпионатына дайындық, спорттық инфрақұрылым, ареналардың дайындығы және Қазақстан мен World Boxing арасындағы ынтымақтастық мәселелерін талқылады.

World Boxing өкілдері әлем біріншілігінің дайындық жоспарымен танысып, Қазақстанда халықаралық спорттық іс-шараларды ұйымдастыру деңгейіне жоғары баға берді.

Еске сала кетейік, World Boxing ұйымдастыратын әлем чемпионаты 2027 жылдың сәуір айында Астанада өтеді.

Қазақстанның ерлер құрамасы Сербияда өткен «Belgrade Winner» халықаралық турнирінде бір алтын медаль жеңіп алды.

Қазақстан құрамасынан үш боксшы ақтық сынға жолдама иеленді

60 келі. Нұрасыл Төлебек жартылай финалда Армения спортшысы Эрис Арстамяннан 4:1 есебімен басым түсті.

70 келі. Нұрбек Мурсал сербиялық қарсыласы жекпе жектен бас тартуына байланысты, жартылай финалда жеңімпаз деп танылды.

90 келі. Ибрагим Бетаев қарсыласы Богдан Толмачов (Украна) жарақатына байланысты, жекпе жексіз финалға өтті.

Төрт боксшымыз қола жүлдегер атанды.

50 келі. Нұрзат Оңғаров 1/2 финалда филиппиндік Кларк Вицераға жол берді.

80 келі. Нұрсұлтан Шілдебай Олимпиада чемпионы Александр Хижнякқа есе жіберді.

85 келі. Аян Қалмағанбетов украиналық Данило жасанға 2:3 есебімен жеңілді.

+90 келі. Аслан Елдібайұлы Түркия өкілі Берат Акарға жол берді.

Финалдық жекпе жектер 17 мамырға жоспарланған.

15 мамыр күні Ташкентте World Boxing ұйымының қолдауымен өткен 17 жасқа дейінгі жасөспірімдер арасындағы Азия чемпионаты аяқталды. Бұл жарыста Қазақстан құрамасы сәтті өнер көрсетті.

Қазақстан құрамасы чемпионаттың финалдық күнінде сегіз алтын медаль жеңіп алды. Алайда жалпыкомандалық медаль кестесінде Өзбекстанға жол беріп, екінші орынға тұрақтады.

Жарыс қорытындысы бойынша алаң иелері — Өзбекстан құрамасы 9 алтын, 7 күміс және 6 қола медальмен бірінші орын алды. Қазақстан құрамасы 8 алтын, 3 күміс және 5 қола жүлдемен екінші сатыға жайғасты. Үздік үштікті 2 алтын, 7 күміс және 8 қола медаль иеленген Үндістан түйіндеді.

Турнирдің соңғы күнінде Қазақстанның ұлдар және қыздар құрамалары 11 финалда өнер көрсетіп, 8 алтын медаль жеңіп алды.

Ұлдар арасында Нұрасыл Ғалым (50 келі), Әмір Мұхит (60 келі), Әлібек Алпамыс (80 келі) және Сабыржан Сағым (+80 келі) Азия чемпионы атанды. Нұрасыл финалда моңғолиялық Сулд Усухбаатарды 5:0 есебімен жеңсе, Әмір өзбекстандық Ахмадхон Абдусатторовтан 4:0 есебімен басым түсті. Әлібек Өзбекстан өкілі Самандарбек Умаровты 4:1 есебімен ұтты, ал Сабыржан ирандық Мохаммедясин Заирге қарсы жекпе-жекті мерзімінен бұрын жеңіспен аяқтады.

Ұлдар арасында Мейіржан Жүніс (63 келі) пен Ислам Сүлейманоғлы (66 келі) финалда өзбек боксшыларына есе жіберіп, күміс жүлдегер атанды.

Қыздар арасында Қазақстанға алтын медальдарды Хатшепсут Садвакасова (50 келі), Аяулым Оспанова (66 келі), Диана Надырбек (75 келі) және Жансая Ержан (80 келі) сыйлады. Сонымен қатар, Балым Ғабитқызы (60 келі) күміс медаль жеңіп алды.

Қазақстан құрамасы сапында Азия чемпионатының қола жүлдегерлері атанғандар: Нұрислам Оналбек (57 келі), Бекхан Уразбай (52 келі), Айлин Ходжамбердиева (70 келі), Милана Иншина (46 келі) және Розалия Вайдеман (57 келі).